Përfundon afati për regjistrimin e votuesve jashtë Kosovës për votim me postë
Të shtunën në mesnatë përfundoi afati 38-ditor për regjistrimin e votuesve jashtë Kosovës që dëshirojnë të votojnë me postë në zgjedhjet lokale për kryetarë dhe kuvende komunale. Kjo procedurë vlen vetëm për ata që janë regjistruar paraprakisht për votim përmes postës.
Zëdhënësi i Komisionit Qendror të Zgjedhjeve (KQZ), Valmir Elezi, bëri të ditur se periudha për votim me postë është e kufizuar dhe do të nisë më 17 shtator, duke përfunduar më 11 tetor. Ai shtoi se në këto zgjedhje nuk do të ketë mundësi votimi në përfaqësi diplomatike, por vetëm përmes postës.
“Votimi përmes postës do të fillojë më 17 shtator dhe do të përmbyllet më 11 tetor. Ky proces është i dedikuar vetëm për votuesit jashtë Kosovës që janë regjistruar gjatë periudhës 23 korrik – 29 gusht 2025. Në Zgjedhjet Lokale nuk ka votim në përfaqësi diplomatike, por vetëm përmes postës”, tha Elezi.
Ai theksoi se KQZ-ja do të sigurojë që çdo votues jashtë vendit të marrë paketën me dy fletëvotime, ndërsa përgjegjësi e secilit është të dërgojë këtë paketë në kutitë postare të KQZ-së, të vendosura si jashtë vendit, ashtu edhe në Kosovë.
/RTK/
